Бокстан Қазақстан ерлер құрамасы Италияның Бусто-Арсицио қаласында өтетін лицензиялық турнирге дайындалып жатыр. Бұл туралы KAZ.NUR.KZ Қазақстан бокс федерациясының Instagram-дағы ресми парақшасына сілтеме жасап хабарлайды.
Қазақстандық боксшылардың оқу-жаттығу жиыны Түркістан облысында өтіп жатыр. Оған 80-ге жуық былғары қолғап шебері қатысуда. Олардың ішінде Италияға аттанатын алты боксшыдан бөлек, ұлттық құраманың өзге де мүшелері мен әр облыстың құрамалары бар.
Айта кетейік, Италиядағы іріктеу турнирі 4-12 наурыз аралығында өтеді. Бұл жарыcқа 114 елден 668 спортшы қатыспақ. Турнирде 28 лицензия сарапқа салынады.
Жарысқа қатысатын бокстан Қазақстан ерлер құрамасы:
- 51 келі: Сәкен Бибосынов;
- 57 келі: Махмұд Сабырхан;
- 63,5 келі: Мұхаммедсабыр Базарбайұлы;
- 71 келі: Асланбек Шымбергенов;
- 80 келі: Нұрбек Оралбай;
- 92 келі: Айбек Оралбай.
Қазір Қазақстан ерлер құрамасының қоржынында Париж Олимпиадасының бір жолдамасы бар. Оны 2023 жылғы жазғы Азия ойындарында аса ауыр салмақта cынға түскен Қамшыбек Қоңқабаев иеленген еді.
Мақаланың түпнұсқасы: https://kaz.nur.kz/sport/boxing/2063293-bokstan-qazaqstan-quramasy-olimpiada-zoldamasy-sarapqa-salynatyn-zarysqa-daiyndalyp-zatyr-video/
