Сәкен Бибосынов Бахрейн азаматтығын алған қазақпен Олимпиада жолдамасын сарапқа салады

Қазақстандық боксшы Сәкен Бибосыновтың Бусто-Арсицио (Италия) қаласында өтіп жатқан әлемдік лицензиялық турнирдің 1/8 финалындағы қарсыласы белгілі болды. Бұл туралы KAZ.NUR.KZ тілшісі хабарлайды.

51 келіге дейінгі салмақта сынға түсетін Сәкен Бибосынов лицензиялық турнирдің келесі кезеңіне өту үшін Бахрейн елінің спорттық азаматтығын алған қазақ боксшысы Азат Махметовпен қолғап түйістіреді. Екі қазақ боксшысы арасындағы жекпе-жек 10 наурызда өтеді.

Еске салайық, Сәкен Бибосынов турнирдің бірінші айналымында Гонконг өкілі Каннет Чун Хим Танмен жолыққан еді. Бұл жекпе-жекте қазақстандық боксшы қарсыласын бірнеше рет нокдаунға жіберіп, уақытынан бұрын жеңіске жетті. Ал екінші кезеңде Бибосынов кениялық былғары қолғап шебері Давид Каранжа Мачариямен кездесіп, төрешілердің бірауыздан шешімімен басым түсті.

Айта кетейік, Италиядағы лицензиялық турнирде Париж Олимпиадасының жолдамалары (ерлер арасында 28, әйелдер арасында 21) сарапқа салынады. Былғары қолғап шеберлері Олимпиада лицензиясына ие болу үшін жартылай финалға дейін жетуге тиіс.

Мәтіннен қате тапсаңыз, бізге жазыңыз