Қазақстандық кәсіпқой боксшы Жәнібек Әлімханұлы абсолют әлем чемпионы украиналық Александр Усикпен кездесті. Бұл туралы KAZ.NUR.KZ тілшісі хабарлайды.
"Сені көргеніме қуаныштымын. Спаррингке келіп, мені қолдағаныңа рақмет. Сондай-ақ құнды кеңесіңе алғыс айтамын", - деп жазды Әлімханұлы Instagram желісіндегі парақшасында.
Айта кетейік, Александр Усик мамырда британдық Тайсон Фьюриді жеңіп, абсолют әлем чемпионы атанған еді.
Жәнібек Әлімханұлы 13 шілдеде Ресей тумасы, Жаңа Зеландияның атынан шығатын Андрей Михайловичпен жұдырықтасады. Жекпе-жек Лас-Вегастағы (АҚШ) Palm Casino Resort аренасында өтеді.
Әлімханұлы (15-0, 10 КО) соңғы жекпе-жегінде Германия өкілі Винченцо Гуальтиериді алтыншы раундта нокаутқа түсіріп, WBO және IBF белбеулерінің иегері атанған болатын.
Андрей Михайлович (21-0, 13 КО) соңғы рет шаршы алаңға сәуірде шықты. Ол венесуэлалық Эдисон Сальтаринмен кездесіп, бесінші раундта техникалық нокаутпен жеңіске жеткен еді.
Мақаланың түпнұсқасы: https://kaz.nur.kz/sport/boxing/2113068-zhanibek-alimhanuly-absoliut-alem-chempiony-aleksandr-usikpen-kezdesti-video/
