Бокстан Қазақстан құрамасының бас бапкері Мырзағали Айтжанов Нұрбек Оралбайдың жартылай финалдағы өнеріне баға берді. Бұл туралы KAZ.NUR.KZ тілшісі хабарлайды.
"Әлемдегі ең мықты боксшылардың жиналған жарысында әрбір кездесу оңайға соқпайды. Доминикандық қарсыласымыздың жекпе-жектерін көрдік. Мықты деген боксшыларды ұтты. Қандасымыз Тоқтарбекті де жеңген еді. Осылардың барлығын зерттеп, Нұрбекке тапсырма бердік. Қарсыласына шабуылдамай, керек кезде соққы жұмсап отыру керек екенін айттық. Тапсырманы толық орындап шықты.
Нұрбек біраз жігіттердің кеткен есесін қайтарды деп ойлаймын. Бастысы жеңісті бізге бергеніне қуанамыз. Финалға да жақсылап дайындалып шығамыз. Бар күшін салады", - деді Айтжанов "Хабар" телеарнасына берген сұқбатында.
Еске салайық, бокстан Қазақстан құрамасының бас бапкері Мырзағали Айтжанов қазақстандық боксшылардың Париж Олимпиадасындағы өнеріне баға берген еді.
Нұрбек Оралбай жартылай финалда Доминикан Республикасының боксшысы Кристиан Хавьер Пиналеспен кездесті. 80 кг салмақ дәрежесінде сынға түскен қазақстандық боксшы төрешілердің шешімімен жеңіске жетті (3:2). Енді отандасымыз Нұрбек украиналық Александр Хижняк пен пен кубалық Арлен Лопез жұбының жеңімпазымен Париж Олимпиадасының алтыны үшін жұдырықтасады. Финалдық бәсеке 7 тамызға жоспарланған.
- Нұрбек Оралбай Париж Олимпиадасының финалына шықты
- Париж Олимпиадасы: Әсем Орынбай финалдық кезеңге шыға алмады
Мақаланың түпнұсқасы: https://kaz.nur.kz/sport/boxing/2144349-myrzagali-aitzhanov-nurbek-qazaqstandyq-boksshylardyng-esesin-qaitardy/
