Кәсіпқойдан әуесқой боксқа оралған Абылайхан Жүсіпов Грузияда өткен халықаралық турнирде топ жарды. Бұл туралы KAZ.NUR.KZ тілшісі хабарлайды.
Абылайхан Жүсіпов пен басқа да қазақстандық боксшылардың жеңісі туралы Олимпиада чемпионы Серік Сәпиев Instagram желісіндегі ресми парақшасында жазды.
"Грузияда әлем және Еуропа чемпионы Георгия Канделакидің жүлдесіне арналған халықаралық турнир аяқталды. Біздің команда сәтті өнер көрсетіп, үш алтын, үш қола медаль жеңіп алды. Абылайхан Жүсіпов үздік боксшы атанды.", - деп жазды Сәпиев.
Айта кетейік, Абылайхан Жүсіпов – әлем чемпионатының үш дүркін қола жүлдегері (2017, 2019, 2021). Ол 2022 жылы кәсіпқой боксқа ауысқан еді. 27 жастағы боксшы кәсіпқой рингте төрт жекпе-жек өткізіп, оның бәрінде жеңіске жетті және үшеуін нокаутпен аяқтаған.
Жүсіпов биыл шілдеде әуесқой боксқа оралатынын мәлімдеді. Ол KAZ.NUR.KZ тілшісіне берген сұқбатында неге мұндай шешім қабылдағанын және жоспарларын айтқан еді.
Мақаланың түпнұсқасы: https://kaz.nur.kz/sport/boxing/2158918-auesqoi-boksqa-oralgan-qazaqstandyq-bylgary-qolgap-sheberi-halyqaralyq-turnirde-chempion-atandy/
