World Boxing әлем чемпионаты: қазақстандық боксшы жарыс жолынан шығып қалды

Қазақстандық боксшы Диас Серікұлы АҚШ-тың Пуэбло қаласында World Boxing ұйымдастырып жатқан әлем чемпионатының ширек финалында жеңіліс тапты. Бұл туралы KAZ.NUR.KZ хабарлайды.

World Boxing ұйымдастырып жатқан жастар арасындағы (U19) әлем чемпионатының ширек финалдық кезеңінде 70 кг дейінгі салмақта Диас Серікұлы аустралиялық Дияншу Редхуға төрешілердің бірыңғай шешімімен жеңіліс тапты.

Диас Серікұлы бірінші раундта жеңіске жеткенімен, келесі екі раундта қарсыласына жол берді. Сондай-ақ үшінші раундта төреші Диас Серікұлының бір ұпайын шегеріп тастады.

Естеріңізге сала кетейік, жарыстың алғашқы күні Диас Серікұлы (70 кг) Алжир боксшысынан басым түссе, екінші күні Ерасыл Аманғалиев (55 кг) пен Асылхан Көшербай (65 кг) чехиялық қарсыластарын мерзімінен бұрын жеңді.

Енді Ерасыл Аманғалиев пен Асылхан Көшербай ширек финалда америкалық боксшылармен кездеседі.

Ал Даниял Райымбеков (85 кг) жеребе бойынша жарысты бірден жартылай финалдан бастайды. Алғашқы жекпе жегінде ол Оңтүстік Корея боксшысымен шеберлік байқасады.

Айта кетейік, World Boxing ұйымдастыруымен алғаш рет өтіп жатқан 19 жасқа дейінгі боксшылар арасындағы әлем чемпионаты 2 қарашаға дейін жалғасын табады. Әлем чемпионатына 30 елден 180 боксшы бақ сынауда.

Мәтіннен қате тапсаңыз, бізге жазыңыз