Қытайдағы қазақ боксшысы әлем чемпионатында қарсыласын мерзімінен бұрын жеңді

Бокстан Қытай құрамасындағы қазақ қызы Дина Санатбек Будвада (Черногория) өтіп жатқан жастар арасындағы әлем чемпионатының жартылай финалына шықты. Бұл туралы KAZ.NUR.KZ хабарлайды.

Дина Санатбек әлем біріншілігінде 66 кг салмақ дәрежесінде сынға түсіп жатыр. Ол ширек финалда Оңтүстік Африкадағы Лесото мемлекетінің спортшысы Рейтуметсе Мокомамен жұдырықтасты. Жекпе-жек үш раундқа жоспарланған еді. Бірақ Дина екінші раундта мерзімінен бұрын жеңіске жетті.

Боксшы шаршы алаңға шығар алдында журналист Аслан Қаженовпен аз-кем әңгімелесіп, өзінің қазақ екенін айтқан.

Дина Санатбек Будва бәсекесіндегі алғашқы жекпе-жегінде венесуэлалық Лорен Акостаны сенімді түрде ұтқан болатын.

Айта кетейік, әлем чемпионатының жартылай финалына қазақстандық 17 боксшы жолдама алды. Осылайша Қазақстан құрамасы 17-18 жас санатындағы әлем біріншілігінің жартылай финалистер саны бойынша өз рекордын жаңартты.

Жарыстың жалпы жүлде қоры – 500 000 АҚШ доллары. Жеңімпаздарға 8000 доллар, күміс жүлдегерлерге 4000 доллар, қола жүлдегерлерге 2000 доллар, ширек финалистерге 1000 доллар сыйақы беріледі.

Мәтіннен қате тапсаңыз, бізге жазыңыз