Ұлттық құраманы дайындап жатқан америкалық бапкер жаттығуда қазақша сөйлеп жүр (видео)

Таиландта өтетін Азия чемпионаты қарсаңында Қазақстанның бокс құрамасының физикалық дайындығына жауапты америкалық бапкер Кристофер Камачо жаттығу барысында қазақша сөйлеп, көпшілікті таңдандырды. Бұл туралы KAZ.NUR.KZ хабарлайды.

Қазақстан бокс федерациясының Instagram желісіндегі ресми парақшасында боксшылардың Кристофер Камачоның жетекшілігімен өткізген жаттығу барысынан видео жарияланды.

Бұл видеодан америкалық маман спортшылармен аудармашы арқылы тілдесіп, арасында қазақ тілінде "Дайындал" деп бастама беретінін көруге болады. Жаттығу соңында Кристофер Камачо жігіттерді "Бері кел" деп жинап, ағылшын тілінде жігерлі сөздерін айтты. Боксшылар оған "Қазақстан, алға" деп ұрандатып жауап қайтарды.

Дереккөздің мәліметінше, қазақстандық боксшылар Ресей, Куба және Грекия спортшыларымен бірлескен жаттығу жұмыстарын жүргізіп жатыр.

Айта кетейік, Кристофер Камачо көптеген жыл бойы кәсіби рингтегі түрлі жекпе-жегі алдында Геннадий Головкиннің жаттығу лагерьлеріне қатысқан.

Сонымен бірге ол танымал ММА спортшылары Хабиб Нурмагомедов, Дэниал Кормье, Кейн Веласкес, Люк Рокхолдпен жұмыс істеген.