Жеңіліп көрмеген қазақстандық боксшы алғаш рет АҚШ-та жекпе-жек өткізеді

Аса жеңіл салмақта жұдырықтасатын қазақстандық кәсіпқой боксшы Айдос Медеттің (12-0, 8 КО) келесі қарсыласы мен жекпе-жек күні белгілі болды. Бұл туралы KAZ.NUR.KZ BoxRec.com порталына сілтеме жасап хабарлайды.

11 желтоқсанда Плант-Ситиде (Флорида, АҚШ) өтетін бокс кешінде Айдос Медет никарагуалық Херсон Ортиспен (17-11, 8 КО) жұдырықтасады. Жекпе-жек алты раундқа жоспарланған. Кездесу Қазақстан уақыты бойынша 12 желтоқсанда таңертең болады.

Айдос Медет АҚШ-та алғаш рет жекпе-жек өткізгелі тұр. Бұған дейінгі бір кездесуі Стамбұлда өтсе, қалғандарының бәрі Қазақстанда болған. Түркияда ол ресейлік Руслан Берчукпен (14-25, 4 КО) жұдырықтасып, төрешілердің шешімімен жеңіске жеткен болатын.

Еске салайық, екінші орта салмақтағы қазақстандық кәсіпқой боксшы Әли Ахмедов келесі жекпе-жегін қашан өткізетіні белгілі болған еді. Ол 2025 жылдың 25 қаңтарында АҚШ-тың Калифорния штатындағы Коммерс қаласында жекпе-жекке шығады. Әзірге боксшының қарсыласы туралы ақпарат жарияланған жоқ.

Мәтіннен қате тапсаңыз, бізге жазыңыз