Дулат Бекбауов қарсыласын мерзімінен бұрын жеңіп, Азия чемпионатының жартылай финалына шықты

Қазақстандық боксшы Дулат Бекбауов Таиландтағы Азия чемпионатының жартылай финалына өтті. Бұл туралы KAZ.NUR.KZ тілшісі хабарлайды.

Дулат Бекбауов 1/4 финалда малайзиялық Арифф Айман Мухаммадпен жұдырықтасты. 67 кг салмақ дәрежесіндегі жекпе-жекте қазақстандық боксшы үш раундта да қарсыласын нокдаунға түсірді. Төреші үшінші раундта жекпе-жекті мерзімінен бұрын тоқтатты.

Айта кетейік, Дулат Бекбауов алғашқы жекпе-жегінде тайпейлік Джиа-Джун Чиуан Вангпен кездесіп, 5:0 есебімен ұтқан еді.

Осыған дейін бокстан Қазақстан ерлер құрамасының тағы бір мүшесі Диас Молжігітов жапониялық қарсыласы шаршы алаңға шыға алмайтын болған соң, Азия чемпионатының жартылай финалына жолдама алған еді.

Бүгін, 4 желтоқсанда Азия чемпионатының ширек финалында тағы 3 қазақстандық боксшы бақ сынайды. Абылайхан Жүсіпов түрікменстандық Байрамдурды Нұрмұхаммедовпен, Айгерім Сәттібаева филиппиндік Офелия Маньомен, Сымбат Әлиасқар қытайлық Вен Шань Хумен жұдырықтасады.