Қазақстандық боксшы Оразбек Асылқұлов Таиландтағы Азия чемпионатының жартылай финалына өтті. Бұл туралы KAZ.NUR.KZ тілшісі хабарлайды.
Оразбек Асылқұлов ширек финалда таиландтық Пануват Чожан-Атпен кездесті. 57 кг салмақ дәрежесіндегі жекпе-жекте қазақ боксшысы төрешілердің шешімімен жеңіске жетті. Енді ол финалған жолдаманы Лунда Бантумурмен (Моңғолия) сарапқа салады. Жекпе жек 8 желтоқсанға жоспарланған.
Айта кетейік, Оразбек Асылқұлов Азия чемпионатындағы алғашқы жекпе-жегінде малайзиялық Зулхайлан Мохамадты екінші раундта техникалық нокаутпен ұтқан еді.
Бүгін, 5 желтоқсанда тағы бес қазақстандық боксшы шаршы алаңға шығады. Ерлер арасында Бейбарыс Жексен тәжістандық Акмал Убайдовпен, Ерасыл Жақпеков қырғызстандық Сағын Сатыбалды Уулумен жұдырықтасады. Ал әйелдер арасында Жазира Орақбаева тайбэйлік Луо Ю Тинмен, Ұлжан Сәрсенбек вьетнамдық Нгуен Хуен Чанмен және Виктория Графеева тайбэйлік Е Чен-Сюаньмен қолғап түйістіреді.
Мақаланың түпнұсқасы: https://kaz.nur.kz/sport/boxing/2196560-orazbek-asylqulov-taibeilik-boksshyny-zhengip-aziia-chempionatynyng-zhartylai-finalyna-shyqty/
