Бокстан Қазақстан әйелдер құрамасының спортшылары Виктория Графеева мен Аида Әбікеева Таиландтағы Азия чемпионатының финалына шықты. Бұл туралы KAZ.NUR.KZ хабарлайды.
Виктория Графеева 60 кг салмақ дәрежесіндегі жартылай финалда Таиланд спортшысы Порнтип Буапамен кездесті. Бұл бәсекеде қазақстандық боксшы бірінші және екінші раундта қарсыласын нокдаунға жіберді. Кейін төреші жекпе-жекті тоқтатып, Графеева техникалық нокаутпен жеңіске жетті.
63 кг салмақтағы Аида Әбікеева да жартылай финалда таиландтық боксшымен жұдырықтасты. Оның қарсыласы Париж Олимпиадасының қатысушысы Тхананья Сомнуек болды. Тартысты өткен кездесуде Әбікеева 4:1 есебімен қарсыласынан басым түсті.
Еске салайық, Жазира Орақбаева мен Ұлжан Сәрсенбек жартылай финалда қарсыластарына есе жіберіп, Азия чемпионатының қола жүлдегері атанған еді. Сондай-ақ бес балалы ана Әйгерім Сәттібаева да қола медаль еншіледі.
Мақаланың түпнұсқасы: https://kaz.nur.kz/sport/boxing/2197482-qazaqstandyq-eki-boksshy-aziia-chempionatynyng-finalyna-shyqty/
