"Қашып жүрген жоқпын": Хамза Шираз Жәнібек Әлімханұлымен жекпе-жектен неге бас тартқанын айтты

Британиялық кәсіпқой боксшы Хамза Шираз неге IBF және WBO тұжырымдары бойынша әлем чемпионы Жәнібек Әлімханұлымен жекпе-жектен бас тартып, оның орнына WBC чемпионы доминикалық Карлос Адаместі таңдағанын айтты. Бұл туралы KAZ.NUR.KZ Youtube-тегі BoxNation арнасына сілтеме жасап хабарлайды.

Жәнібек Әлімханұлы мен WBO титулына міндетті үміткер болған британиялық Хамза Шираз арасында жекпе-жек өтеді деп жоспарланған еді. Тіпті WBO бұл жекпе-жекке арналған бәссауданы да жариялады. Алайда Хамза Шираздың командасы жекпе-жектен бас тартты. Британиялық боксшы 22 ақпанда WBC титулы үшін Карлос Адамеспен жұдырықтасатын болды.

"Бұл Фрэнк Уорреннің (Шираздың промоутері – ред.ескертпесі) шешімі. Мен WBC титулына Уильямспен болған жекпе-жектен кейін-ақ міндетті үміткер болғанмын. Яғни, Карлос Адамеспен бұрынырақ жекпе-жек өткізуім керек еді. Бірақ, оның өзге боксшымен жұдырықтасуын күтетін болғандықтан, уақыт жоғалтпайын деп мен Тайлер Деннимен аралық кездесу өткізем деп шештім. Адамеспен жекпе-жегім WBO мені Жәнібекпен жұдырықтасуға міндеттеуден бұрын жоспарланып қойған. Тек мұны көпшілік білмейді, жарнамалаған жоқпыз.

Мені Жәнібектен қашып жүр деп ойлау ақымақтық. Боксшылар ешқашан бір-бірінен қашпайды. Бәрі қаржыға келіп тіреледі, тиімді болса жекпе-жекке кіммен болса да шыға бересің. 

Жәнібек қазір әркімнен жекпе-жек сұрап жалынып жүр. Соған байланысты хейтерлер бізді айыптауда. Иә, ол мықты боксшы, бірақ танымал емес. Сондықтан жекпе-жек алу үшін қолынан келгеннің бәрін істеп жатыр, тіпті кейде ақымақ болып кетеді", - деді Хамза Шираз.

Еске салайық, Жәнібек Әлімханұлы қазанда Сиднейде (Аустралия) жаңазеландиялық Андрей Михайловичпен жұдырықтасып, нокаутпен жеңген еді.

Мәтіннен қате тапсаңыз, бізге жазыңыз