Қазақстандық дзюдошы Grand Slam жарысының чемпионы атанды

Қазақстандық дзюдошы Нұрқанат Серікбаев Тбилисиде (Грузия) өтіп жатқан Grand Slam (Үлкен дулыға) жарысының алтын медалін иеленді. Бұл туралы KAZ.NUR.KZ тілшісі хабарлайды.

60 келіге дейінгі салмақта сынға түскен Нұрқанат Серікбаев турнирдің финалында Израиль өкілі Ям Волчакты жеңді. Осылайша, қазақстандық дзюдошы мансабында алғаш рет Grand Slam жарысында алтын медаль еншіледі. Ол 2023 жылы Өзбекстанда өткен Grand Slam турнирінде күміс, сол жылы Түркияда өткен тағы бір "Үлкен дулыға" бәсекесінде қола медаль жеңіп алған еді.

Айта кетейік, Серікбаев Тбилисидегі жарыстың іріктеу кезеңінде Джохан Рожас (Колумбия), Иехонатан Векслер (Израиль) және Дильшот Халматовтан (Украина) басым түсті. Ал жартылай финалда Grand Slam жарысының үш дүркін жеңімпазы Балабай Агаевты (Әзербайжан) ұтқан болатын.

Тбилисидегі Grand Slam турнирі 24 наурызға дейін жалғасады. Бұл додаға әлемнің 83 елінен 531 дзюдошы қатысып жатыр.

Мәтіннен қате тапсаңыз, бізге жазыңыз