Ғалия Тынбаева қазақ қыздары арасында тұңғыш рет Grand Slam турнирінің чемпионы атанды

Қазақстандық дзюдошы Ғалия Тынбаева Астанада өтіп жатқан Qazaqstan Barysy Grand Slam турнирінің жеңімпазы атанды. Бұл туралы KAZ.NUR.KZ Ұлттық Олимпиада комитетінің ресми сайтына сілтеме жасап хабарлайды.

48 кг салмақта өткен финалдық белдесуде Ғалия ресейлік дзюдошы Сабина Гилиязованы жеңді. Қазақстандық спортшы алдымен "ваззари", кейін "иппон" ұпайын алып, кездесуді мерзімінен бұрын аяқтады. 

Осылайша, Ғалия Тынбаева қазақ қыздары арасында тұңғыш рет Grand Slam додасының алтынын алып отыр. Ол аталған турнирдің финалына мансабында алғаш рет шыққанын жазған едік.

Ғалия Тынбаева жақында Гонконгте өткен дзюдодан Азия чемпионатында қола жүлдеге ие болды. Ол үшінші орынға таласта отандасы Әбиба Әбужақыновадан басым түскен болатын.

Мәтіннен қате тапсаңыз, бізге жазыңыз