Еркін күрестен екі дүркін әлем чемпионы Франк Чамиcо қазақстандық балуан Ризабек Айтмұханның әлеуетін жоғары бағалады. Бұл туралы KAZ.NUR.KZ Sportnews.kz сайтына сілтеме жасап хабарлайды.
"Ризабек өте жақсы өнер көрсетіп жүр. Оның болашағы жарқын. Күресте әртүрлі деңгейдегі балуандар бар. Ең жоғарғы шыңда – бес-алты балуан ғана бар, олармен тең дәрежеде күресу қиын. Одан кейінгі деңгей – жақсы күресетін, даму үстінде жүрген балуандар. Ризабекке көп жұмыс істеу керек, сондай-ақ үлкен турнирлерде тәжірибе жинау қажет. Кім біледі, мүмкін, біз оны 2028 жылы Лос-Анджелестегі Олимпиадада көретін шығармыз? Күресте мақсатыңа жету үшін кез келген жағдайға дайын болу маңызды. Егер Ризабек осыған дайын болса, ол болашақта спорттың биік шыңында болады деп сенемін", - деді Франк Чамиcо.
Франк Чамиcо Ризабек Айтмұхан мен ресейлік балуан Абдулрашид Садулаев арасындағы мүмкін болатын жекпе-жек туралы сұраққа да жауап берді.
"Мен жоғарыда айтқанымдай, Абдулрашид Садулаев – қазір өз бабында. Кім біледі, болашақта Ризабек оны жеңуі мүмкін. Бірақ дәл қазір мұны сенімді түрде айту қиын. Абдулрашид – мен өмірімде көрген ең мықты балуан", - деп түйіндеді ол.
Еске салайық, екі дүркін Олимпиада чемпионы Абдулрашид Садулаев Тиранада өткен олимпиадалық емес салмақ дәрежелері бойынша өткен әлем чемпионатында алтын медаль иеленді. Бұл – Абдулрашид Садулаевтың әлем чемпионаттарындағы алтыншы жеңісі.
Албания астанасы Тиранада өткен жастар арасындағы әлем чемпионатында Ризабек Айтмұхан 97 кг дейінгі салмақта алтын медаль жеңіп алған еді. Бұған дейін Ризабек Айтмұхан қыркүйекте Испанияда өткен 20 жасқа дейінгі спортшылар арасында өткен әлем чемпионатында қарсылас шақ келтірмей, жеңімпаз атанған болатын. Сондай-ақ Ризабек Айтмұхан 2023 жылы Сербияның Белград қаласында өткен ересектер арасындағы әлем чемпионатында алтын жүлде иеленген болатын. Осылайша ол тәуелсіз Қазақстанның еркін күрес тарихында әлем чемпионы дәрежесіне жеткен тұңғыш балуан атанды.
Франк Чамисо 29 қарашада Астанада еркін және грек-рим күресі бойынша өтетін Wrestling Stars халықаралық турниріне қатысады.
Мақаланың түпнұсқасы: https://kaz.nur.kz/sport/fight/2194107-kop-zhumys-isteu-kerek-eki-durkin-alem-chempiony-rizabek-aitmuhannyng-aleuetin-bagamdady/
