Әлемдік дзюдоның жаңа маусымы Франция астанасы Парижде өтетін Grand Slam сериясы кезеңімен басталады. Бұл туралы KAZ.NUR.KZ Ұлттық Олимпиадалық комитеттің ресми сайтына сілтеме жасап хабарлайды.
Париждегі турнир 1-2 ақпан аралығында өтпек. Бұл жарыста дзюдошылар өткен жылы желтоқсанның ортасында ресми түрде енгізілген жаңа ережелер бойынша сынға түседі.
Қазір Қазақстан құрамасы әлемдік рейтингте 12-орында тұр. Жинаған ұпай саны – 87 541. Көш басында – Жапония (219 217 ұпай), екінші орында – Франция (184 924 ұпай). Ал үздік үштікті бейтарап тудың астында өнер көрсететін спортшылар түйіндеп тұр (114 452 ұпай).
Еске салайық, қазақстандық дзюдошылар 2024 жылғы маусымды әлемдік рейтингте қандай орындармен аяқтағанын жазғанбыз. Ең жоғары нәтиже Әбиба Әбужақыноваға тиесілі. Ол 48 кг дейінгі салмақта әлемдік рейтингте 2-орынға жайғасты. Сол салмақта тағы бір қазақстандық спортшы Ғалия Тыныбаева 10-орында тұр. Елдос Сметов маусымды 5-орынмен аяқтаса, Ғұсман Қырғызбаев 12-орынға табан тіреді.
Мақаланың түпнұсқасы: https://kaz.nur.kz/sport/fight/2208176-dziudodan-qazaqstan-quramasy-zhanga-mausymdy-alemdik-reitingte-neshinshi-orynmen-bastaidy/
