"Алаңға кім шықса да, барын салады": Досмағамбетов Словакиямен өтетін матч туралы айтты

Қазақстан құрамасының қорғаушысы Тимур Досмағамбетов Словакиямен болатын ойын алдында баспасөз мәслихатына қатысты, деп хабарлайды KAZ.NUR.KZ тілшісі футбол федерациясына сілтеме жасап.

"Бір ғана нәрсені анық айта аламын: алаңға кім шықса да, бар күшін салып, оң нәтиже тіркеуге тырысады. Асхаттың жоқтығы - біз үшін үлкен шығын. Командада оны алмастыратын жігіттер бар. Ал оның орнына кімнің шығатынын бас бапкер анықтайды", - деді Тимур Досмағамбетов.

Айта кетейік, Ұлттар лигасында Қазақстан ұлттық құрамасы С лигасының үшінші тобында өнер көрсетіп жатыр.

Қазақстан құрамасының қарсыластары - Словакия, Әзербайжан және Беларусь құрамалары.

Алғашқы турда ел құрамасы Нұр-Сұлтан қаласындағы "Астана арена" стадионында Әзербайжанмен кездесіп, 2:0 есебімен жеңіске жетті.

Аталған матчта Қазақстан футбол командасының капитаны Асхат Тағыберген жарақат алып қалған болатын.

Бүгін Нұр-Сұлтан уақытымен 00:45-те Қазақстан құрамасы сырт алаңда Словакиямен ойнайды.