Қазақстан футзал қауымдастығының жаңа президенті болып футзалдан белгілі төреші Талғат Қосмұхамбетов сайланды. Бұл туралы Қазақстанның футбол федерациясы хабарлады.
Талғат Қосмұхамбетов – Қостанайдың "Тобыл" футбол мектебінің түлегі. Футболшы ретінде 2001-2005 жылдар аралығында қостанайлық "Тобыл" сапында ойнаған.
2011-2017 жылдары "Тобыл" футбол клубы директорының орынбасары, 2019-2020 жылдары "Астана" футбол клубы қаржы директоры қызметін атқарған.
Қосмұхамбетов 2022 жылдың сәуір-тамыз айлары аралығында Қазақстан футбол федерациясының Футзал департаменті директорының орынбасары міндетін атқарды.
2022 жылдың қыркүйегінен бастап бүгінгі күнге дейін Қазақстан футзал қауымдастығының Футзал және инспекция департаментінің директоры қызметін атқарды.
"Осы жылдар ішінде Талғат Қосмұхамбетов футзалдан Қазақстан чемпионатының көптеген матчтарына төрелік етті. 2014 жылдан бастап ФИФА санатын алып, футзалдан Чемпиондар лигасы, УЕФА кубогы, Әлем суперкубогы, студенттер арасында Әлем чемпионаты, әйелдер арасындағы Еуропа чемпионатының ойындарында төрелік етті. Сондай-ақ Әлем чемпионаты мен Еуропа чемпионатының іріктеу матчтарында қызмет атқарды. Төрт рет Қазақстанның үздік төрешісі деп танылды", - делінген хабарламада.
Айта кетейік, бұған дейін Қазақстан футзал федерациясы президенті қызметін атқарған Төлеуғали Тайтөлеев қауымдастықтың құрметті президенті қызметіне ауысады.
"Қазақстан футбол федерациясы Төлеуғали Мұхамеджанұлына футзал қауымдастығының президенті лауазымында атқарған жұмысы үшін алғыс білдіріп, жаңа қызметте табыс тілейді", - делінген хабарламада.
Мақаланың түпнұсқасы: https://kaz.nur.kz/sport/football/2024010-talgat-qosmuxambetov-lauazymdy-qyzmetke-sailandy/
