"Астана" футбол клубы Конференция лигасының топтық кезеңі аясындағы екінші кездесуін өткізді. Қазақстандық команда өз алаңында чехиялық "Виктория Пльзеньді" қабылдады, деп хабарлайды KAZ.NUR.KZ.
Ойынның 23-минутында "Астана" капитаны Марин Томасов қарсылас қақпасына гол салды. Алайда ойыннан тыс қалғандықтан бұл нәтиже есепке алынбады.
Матчтің 51-минутында Томасов өз дегеніне жетіп, алғашқы голын салды. Бірақ үш минуттан кейін "Виктория Пльзень" шабуылшысы Томас Хоридің соққысы "Астана" қақпасына дәл тиіп, есеп теңесті.
Қарсыластарын қыспаққа алған чехиялықтар кездесудің 57-минутында екінші голдарын салды. Ойынның тағдырын шешкен футболшы - Ян Копиц.
"Астана Аренада" өткен тартысты матч 1:2 есебімен "Виктория Пльзень" командасының жеңісімен аяқталды.
Бұл "Астананың" Конференция лигасының топтық кезеңіндегі екінші ойыны. Алғашқы турда "Динамо Загреб" командасынан 1:5 есебімен жеңіліп қалған болатын.
Мақаланың түпнұсқасы: https://kaz.nur.kz/sport/football/2039786-konferenciya-ligasy-astana-oz-alanynda-viktoriya-plzenge-ese-ziberdi/
