Германия кубогының 1/16 финалдық кезеңінің аясында өткен "Саарбрюккен - Бавария" арасындағы ойын ешкім күтпеген нәтижемен аяқталды. Германияның үшінші деңгейлі лигасында өнер көрсететін "Саарбрюккен" клубының ойыншылары сенсация жасап, Мюнхендік ұжымды 2:1 есебімен тізе бүктірді, деп хабарлайды KAZ.NUR.KZ.
Ойын "Саарбрюккен" клубының алаңында өтті. Ойындағы алғашқы голды 16 минутта Томас Мюллер соққанымен, бірінші таймның соңғы минуттарында (45+1) ұрымтал тұстан мүлт кетпеген Сонтаймер есепті теңестірді.
"Бавария" ұжымы ойын бойы ұдайы шабуылдағанымен, қарсылас қақпасының кілтін таба алмады. Екінші таймның соңғы минутында (90+6) Гаус гол соғып, өз командасына тарихи жеңісті сыйлады.
Айта кетейік, "Саарбрюккен" футбол клубы 2019/20 маусымда Германия кубогының жартылай финалына дейін жеткен болатын. Ал Мюнхендік клуб дәл осындай сәтсіз серияға 1990 жылдан бері ұшырамаған екен.
Материал авторы: Ерасыл Сайлауғали
Мақаланың түпнұсқасы: https://kaz.nur.kz/sport/football/2043736-fk-bavariya-usinsi-dengeili-ligada-oinaityn-klubtan-zenilis-tapty/
