БАӘ-де өтіп жатқан шағын футболдан әуесқойлар арасындағы әлем чемпионатында Қазақстан құрамасы жартылай финалға шықты, деп хабарлайды KAZ.NUR.KZ.
Рас-эль-Хайма қаласында шағын футболдан өтіп жатқан жаһандық додада Қазақстан құрамасы Чехияны жеңіп, жартылай финалға жолдама алды. Ойынның негізгі уақытында қос ұжым 3:3 есебімен тең түсіп, пенальти сериясында жерлестеріміздің бағы жанды (3:2).
Еске сала кетейік, Қазақстан құрамасы топтық кезеңде Гананы 7:0 есебімен, ал Үндістаннан келген аяқдопшыларды 16:0 есебімен жеңіп, плей-офф сатысына шыққан еді. Плей-оффта жергілікті БАӘ құрамасымен кездесіп, 2:1 есебімен басым түсті.
Қазақстан құрамасы бүгін Астана уақытымен сағат 22:30-де Әзірбайжан құрамасымен финалдық жолдаманы сарапқа салады. Ойынды "World MiniFootball Federation" Facebook парақшасынан тікелей эфирде көруге болады.
Материал авторы: Ерасыл Сайлауғали
Мақаланың түпнұсқасы: https://kaz.nur.kz/sport/football/2043975-qazaqstan-futbolsylary-alem-cempionatynyn-zartylai-finalyna-syqty/
