Футболдан Қазақстан ұлттық құрамасы алдағы ойындарға дайындықты бастады

Футболдан Қазақстан ұлттық құрамасы Еуропа чемпионатының іріктеу турнирі аясындағы ойындарына дайындық жұмыстарын бастады, деп хабарлайды KAZ.NUR.KZ Қазақстан футбол федерациясының ресми сайтына сілтеме жасап.

Қазақстан ұлттық құрамасы қараша айында Еуро-2024 біріншілігінің іріктеу турнирі аясында екі матч өткізеді. Магомед Адиев бастаған ұлттық құрама оқу-жаттығу жиындарын Астана қаласында жүргізіп жатыр. Жоспар бойынша 10 қараша күні ұлттық құрама Қазақстан U-21 құрамасымен жолдастық матч ойнайды. Содан кейін Сан-Марино мен Словенияға қарсы кездесуге шақырту алатын футболшылардың нақты тізімі анықталады.

Еске сала кетейік, 17 қарашада Қазақстан ұлттық құрамасы өз алаңында Сан-Мариноны қабылдайды. Ойын "Астана Арена" стадионында өтеді және елорда уақытымен 21:00-де басталады. Ал 21 қараша күні сырт алаңда Словениямен ойнайды. Матч Любляна қаласындағы "Стожице" стадионында өтеді. Кездесудің басталуы Астана уақытымен 01:45-ке жоспарланған.

Айта кетейік, Қазақстан ұлттық құрамасы 2024 жылғы Еуропа чемпионатына іріктеу турнирі аясында "Н" тобында 15 ұпаймен 3-орында тұр.

Мәтіннен қате тапсаңыз, бізге жазыңыз