"Астана" футбол клубы Конференция лигасындағы жеңіс жолын жалғастыра ала ма

Бүгін, 9 қарашада Конференция лигасының топтық кезеңінің 4-тур аясында елордалық "Астана" клубы косовалық"Балканиды" қабылдайды. Бұл туралы KAZ.NUR.KZ тілшісі хабарлайды.

"Астана" футбол клубы - осы маусымда еурокубок ойындарының топтық кезеңіне дейін жеткен жалғыз қазақстандық команда. Қазақстан Премьер-лигасы аяқталса да, елордалық ұжым үшін футбол маусымы әлі біткен жоқ. Алда УЕФА Конференция лигасының топтық кезеңі аясындағы кезекті матч. Егер Григорий Бабаянның шәкірттері бүгін "Балкани" ұжымын жеңсе, плей-офф ойындарына шығуға мүмкіндік туады.

Елордалық клуб Конференция лигасының "С" тобында "Виктория Пльзень", "Динамо Загреб" және "Балкани" сияқты командалармен плей-офф жолдамасын сарапқа салуда. Топтық кезеңде бірінші орын алған команда 1/8 кезеңіне өтсе, екінші орын алған ұжым жарысты 1/16 кезеңінен жалғастырады.

"Астана" футбол клубы топтық кезеңде 3 матч өткізіп, 2 рет жеңіліп, 1 рет жеңді. Нәтижесінде елордалық команда 3 ұпаймен соңғы орында тұр. Ойын Астана уақытымен 21:30-да болады. "С" тобының турнирлік кестесінің қазіргі жағдайы:

1. "Виктория Пльзень" – 9 ұпай;
2. "Динамо Загреб" – 3 ұпай;
3. "Балкани" – 3 ұпай;
4. "Астана" – 3 ұпай.

Айта кетейік, "Астана" футбол клубы осы маусымда Қазақстан Премьер-лигасының күміс жүлдегерлері атанды. 26 ойында 53 ұпай жинаған елордалық ұжым "Ордабасы" (58 ұпай) командасынан 5 ұпайға қалып қойған еді.

Мәтіннен қате тапсаңыз, бізге жазыңыз