"Пенальти емес": Роналду төрешінің қателігін түзеді
Опубликовано:
"Әл-Наср" клубының жұлдызы Криштиану Роналду Азия Чемпиондар лигасының "Персеполисқа" қарсы матчында пенальти бермек болған төрешінің қателігін түзеді. Бұл туралы KAZ.NUR.KZ тілшісі хабарлайды.
Азия Чемпиондар лигасының топтық кезеңінің 5-турында Роналду ойнайтын "Әл-Наср" футбол клубы "Персеполис" командасымен кездесті. Матчтың 2-минутында Роналдуға қарсы ереже бұзылғандай көрініп, бас төреші Ма Нин бірден пенальти белгіледі.
Алайда Криштиану қарсыласының кесірінен емес, өзінің сәтсіз құлап қалғанын меңзеп, төрешіге пенальти емес екенін айтты.
Төрешілер VAR бейне қайталауын қараған соң шешімді өзгертіп, футболшылар ойынды жалғастырды. Бірде-бір гол соғылмай матч тең аяқталды.
Айта кетейік, "Әл-Наср" сапында Криштиану Роналду, сенегалдық ойыншы Садио Мане, бразилиялық Талиска мен хорват Марцело Брозович сияқты легионерлер ойнайды. "Әл-Наср" Азия Чемпиондар лигасының топтық кезеңінде 5 матч өткізіп, Е тобында 13 ұпаймен бірінші келе жатыр. Келесі ойында саударабиялық клуб тәжікстандық "Истиклол" командасымен кездеседі.
Мәтіннен қате тапсаңыз, бізге жазыңыз
Оригинал статьи: https://kaz.nur.kz/sport/football/2047919-penalti-emes-ronaldu-toresinin-qateligin-tuzedi/