Футболдан Азия кубогының ширек финалына шыққан құрамалар анықталды

Катарда өтіп жатқан футболдан Азия кубогының ширек финалына шыққан барлық құрама анықталды. Бұл туралы KAZ.NUR.KZ Азия кубогының Instagram-дағы ресми парақшасына сілтеме жасап хабарлайды.

Футбол додасының келесі кезеңіне 8 команда жолдама алды. Олардың қатарында Аустралия, Иран, Тәжікстан, Жапония, Катар, Оңтүстік Корея, Өзбекстан және Иордания бар.

Жарыстың 1/8 финалында Аустралия құрамасы Индонезиямен кездесіп, 4:0 есебімен ұтты. Ал Иран командасы Сирияны пенальти сериясында (5:3) артта қалдырды. Тәжікстандықтар да бұл кезеңде БАӘ құрамасынан пенальтиде басым түсіп (5:3), өз тарихында алғаш рет ширек финалда ойнауға мүмкін алды.

Ал Жапония футболшылары Бахрейн командасын 3:1 есебімен тізе бүктірді. Жарыс қожайындары Катар құрамасы Палестинананы жеңді (2:1). Оңтүстік Корея командасы Сауд Арабиясын (4:2), Өзбекстан өкілдері Таиландты (2:1), ал Иордания құрамасы Иракты (3:2) ұтып, ширек финалға жолдама алған еді.

Енді 1/4 финалда келесі жұптар ойнайды:

2 ақпан

• Аустралия — Оңтүстік Корея
• Тәжікстан — Иордания

3 ақпан

• Иран — Жапония
• Катар — Өзбекстан

Айта кетейік, Азия құрлығының футбол додасы 12 қаңтарда басталды және 10 ақпанға дейін жалғасады. Соңғы рет Азия кубогын 2019 жылы Қатар құрамасы жеңіп алды. Финалда Қатар командасы Жапонияны 3:1 есебімен ұтқан еді.

Мәтіннен қате тапсаңыз, бізге жазыңыз