"Армандар орындалады": "Астана" футбол клубы қазақстандық блогермен келісімшарт жасасты

Әуесқой футболшы және блогер Әлішер Келгенбай "Астана" футбол клубымен келісімшарт жасасты. Бұл туралы KAZ.NUR.KZ "Астана" командасының Instagram-дағы ресми парақшасына сілтеме жасап хабарлайды.

Еліміздегі ең танымал футбол блогері және медиа-ойыншы Әлішер Келгенбай "Астана" клубымен 6 айға келісімшарт жасасты. 28 жастағы ойыншы тұңғыш рет кәсіпқой футболда бақ сынамақ.

"Армандар орындалады! Жұғысты болсын", – деп жазды Әлішер Instagram-дағы ресми парақшасында.

Айта кетейік, Әлішер Келгенбай жақында футболдан әуесқойлар арасындағы AFL сup халықаралық жарысында Қазақстан құрамасының сапында ойнап, чемпион атанған еді.

Еске салайық, Әлішер Келгенбай өткен жылы қазақстандық блогер Ұлдана Жиенқұлға үйленіп, тойын футбол стилінде жасады. Жас жұбайлар киімдеріне танымал футбол клубтарының эмблемаларын қолданған. Мысалы, қалыңдықтың жамылғысында "Real Madrid-тің" эмблемасы бейнеленсе, ал "Barcelona" футбол клубының символы күйеу жігіттің костюміне тігілді.

Сондай-ақ Әлішердің гол соғып қуанған сәті әлемдегі танымал пабликте жарияланған еді.