"Реал Мадрид" футбол клубы өз алаңында "Барселонаны" жеңіп кетті

Испания чемпионатының 32-туры аясында "Реал Мадрид" футбол клубы өз алаңында "Барселонаны" қабылдады. Бұл туралы KAZ.NUR.KZ тілшісі хабарлайды.

Бүгін, 22 сәуірде Испания чемпионатының 32-тур ойындары өтті. Ла Лиганың орталық матчында "Реал Мадрид" өз алаңында Хавидің "Барселонасын" қабылдады. Нәтижесінде Карло Анчелоттидің шәкірттері 3:2 есебімен жеңіп, 3 ұпайға қол жеткізді. Осылайша 81 ұпаймен көш бастап тұр. Ал "Барселона" 70 ұпаймен 2-орында.

Ойынның алғашқы голын "Барса" ойыншысы Кристенсен соқты. Алайда 18-минутта мадридтік "Реал" пенальтиден гол салып есеп теңестірді (Винисиус). Ойынның 69-минутында Фирмин Лопес көзге түссе, 73-минутта мадридтік команда сапында Лукас Васкес пен 90+1-минутта Беллингем гол соқты.

Айта кетейік, мадридтік "Реал" Чемпиондар лигасының ширек финалында "Манчестер Ситиді" жеңіп, жартылай финалға жолдама алған еді. Карло Анчелотти шәкірттері 1/2 финалда "Баварияға" қарсы ойнайды.

Мәтіннен қате тапсаңыз, бізге жазыңыз