Шымкенттік "Ордабасы" футбол клубының президенті Абдубаитов Бауыржан Тойшыбекұлы команданың бапкеріне қатысты ресми мәлімдеме жасады. Бұл туралы KAZ.NUR.KZ "Ордабасының" Instagram желісіндегі ресми парақшасына сілтеме жасап хабарлайды.
"Қоғамда кең резонанс тудырған "Ордабасы" клубы өкілдерінің жанкүйерлермен кездесуіне қатысты оқиға жайлы ресми түрде баяндағым келеді. Жиналғандардың барлығына команданың болашағы маңызды және оған шын көңілмен қарайтын клубтың шынайы жақтастары болды. Кездесудегі эмоционалды шиеленіс түсінікті болды, бірақ тараптар бір-бірін тыңдады, барлық шағымдар мен сұрақтар тыңдалды. Барлығы бір-біріне сәттілік тілеп, клубқа қолдау көрсетті.
Өздеріңіз білетіндей, бас бапкер Александр Седнев командадан кеткісі келетінін білдірді, бірақ клуб басшылығымен, ойыншылармен және жанкүйерлермен әңгімелесу кезінде ол жұмысын жалғастыруды дұрыс деп тапты. Шымкент қаласының басшылығы клубтың бас бапкері Александр Седнев пен жаттықтырушылар құрамын толық қолдайтынын, олардың жұмысына толық сенім білдіретінін растаймын. Ешкім жаңа бапкер іздеген емес, іздемейді де. Клубтың барлық мүшелері штаттық режимде жұмыс істеуде және біз бірлескен күш-жігеріміздің табысты болатынына сенімдіміз. Сенімсіз ақпарат пен қауесеттерге сенуге болмайды, сондықтан біз клубтың жанкүйерлері мен ізбасарларын тек тексерілген ақпарат көздеріне сенуге шақырамыз", – деді Бауыржан Тойшыбекұлы.
Айта кетейік, шымкенттік "Ордабасы" футбол клубының бас бапкері Александр Седнев клуб басшылығынан өзін қызметінен босатуды сұраған еді.
Мақаланың түпнұсқасы: https://kaz.nur.kz/sport/football/2090783-ordabasy-futbol-klubynyng-prezidenti-bas-bapkerge-qatysty-resmi-malimdeme-zhasady/
