Қазақстандық шабуылшы Оралхан Өміртаевтің голы "Слуцк" футбол клубына жеңіс сыйлады. Бұл туралы KAZ.NUR.KZ хабарлайды.
Беларусь елінің клубына қысқы трансфер аусымында қосылған 25 жастағы қазақстандық футболшы "Шахтер Солигорск" командасына қарсы ойында дебюттік голын соқты. Беларусь чемпионаты аясында өткен ойын 2:1 есебімен "Слуцк" пайдасына шешілді. Матчтың 3-минутында "Слуцк" ойыншысы Никита Мельников есеп ашты. Ал 17-минутта алаң қожайдарының жартылай қорғаушысы Максим Ковалевич есепті теңестірді – 1:1. Қақпаға баспен дәл соққы жасаған Оралхан Өміртаев 24-минутта өз командасын алға шығарып, жеңіс голын соқты.
Айта кеткен жөн, Оралхан Өміртаев өзінің мансабын қарағандылық "Шахтер" клубында бастап, Қазақстан біріншілігінде "Атырау", "Ақжайық" және "Тобол" командаларының сапында өнер көрсеткен. 2014-2017 жылдары жасөспірімдер құрамасында, ал 2018-2021 жылдар Қазақстан ұлттық құрамасы сапында болды.
Материал авторы: Досбол Атажан
Мақаланың түпнұсқасы: https://kaz.nur.kz/sport/football/2092874-qazaqstandyq-futbolshy-europadagy-algashqy-golyn-soqty/
