2024 жылдың жазында Германияда өтетін Еуропа чемпионатында жаңа ереже қолданылады. Бұл туралы KAZ.NUR.KZ BBC сайтына сілтеме жасап хабарлайды.
Дереккөздің айтуы бойынша, Германияда өтетін футболдан Еуропа чемпионатында жаңа ереже енгізіледі. Енді ойын кезінде тек командалардың капитандары ғана төрешілермен сөйлесе алады. Егер басқа футболшылар қазының шешіміне келіспейтінін көрсетіп, оған қысым көрсетсе бірден сары қағаз алып қалады.
"Құрамалардан талап ететініміз – тек команда капитаны ғана төрешімен сөйлессін. Бұл ойынның бас қазысы жылдам түрде дұрыс шешім шығаруы үшін маңызды. Капитандар ойыншыларын қадағаласа екен", - деді УЕФА директоры Роберто Розетти.
Айта кетейік, Еуро-2024 додасы осы жазда Германияда 14 маусым мен 14 шілде аралығында өтеді. Аталмыш жарыстың алғашқы матчында Германия мен Шотландия құрамалары күш сынасады.
Мақаланың түпнұсқасы: https://kaz.nur.kz/sport/football/2101025-euro-2024-futbol-dodasynda-zhanga-erezhe-engiziledi/
