Еуро-2024: Испания құрамасы Еуропаның төрт дүркін чемпионы атанып, жаңа рекорд орнатты

Еуро-2024 турнирінің финалдық кездесуінде Испания және Англия құрамалары күш сынасты. Бұл туралы KAZ.NUR.KZ тілшісі хабарлайды.

Германияның Берлин қаласында өткен финалдық ойында Испания құрамасы Англия құрамасынан 2:1 есебімен басым түсіп, Еуро-2024 турнирінің чемпионы атанды.

Ойын есебін испаниялықтар ашты. Матчтың 47-минутында Испания құрамасының шабуылшысы Нико Уильямс гол соқты. Ал ойынның 73-минутында екінші таймда алаңға шыққан Англия құрамасының футболшысы Коул Палмер есепті теңестірді. Микель Оярсабаль ойынның 86-минутында гол соғып, испаниялықтарды тағы да алға шығарды. Ойын соңына дейін осы есеп сақталып, Испания құрамасы Еуро-2024 турнирінің жеңімпазы атанды.

14 маусым мен 14 шілде аралығында Германияның 10 қаласында өткен Еуропа чемпионаты биыл он жетінші мәрте ұйымдастырылды.

Бұл біріншілікте басты жүлдені 24 құрама сарапқа салған болатын. Сондай-ақ Еуропа чемпионаты тарихында Германия мен Испания құрамалары үш рет жеңімпаз атанған. Ал осы турнирдегі жеңісінен кейін Испания құрамасы аталмыш нәтиже бойынша көш бастап, жаңа рекорд орнатты. Оcылайша олар төртінші рет Еуропаның үздік құрамасы атанды.

Мәтіннен қате тапсаңыз, бізге жазыңыз