Кнауб пента-трик жасады, Лео алаңнан қуылды: Қазақстан құрамасы Жаңа Зеландияны ірі есеппен жеңді

Футзалдан Қазақстан құрамасы Өзбекстандағы әлем чемпионатының топтық кезеңі аясында Жаңа Зеландияға қарсы ойнап, жеңіске жетті. Бұл туралы KAZ.NUR.KZ тілшісі хабарлайды.

D тобындағы бұл матчта Қазақстан құрамасы 10:0 есебімен жеңіске жетті. Қазақстан құрамасы сапынан Ринат Төреғазин (8-минут), Ақжол Дәрібай (11), Арнольд Кнауб (14, 15, 20, 22, 36), Лео (20, 29) гол соқты.

Матчтың 30-минутында Жаңа Зеландия Логан Вишневский өз қақпасына автогол соғып алды.

Алайда ойынның 38-минутында Қазақстан құрамасының ойыншысы Лео қызыл қағаз алып, алаңнан қуылды.

Осылайша Қазақстн құрамасы D тобында 7 ұпай жинап, екінші орынмен плей-офф кезеңіне жолдама алды. Бұл топта Испания да 7 ұпай еншіледі, тек испаниялықтар гол айырмасы бойынша Қазақстаннан басым түсті.

Әлем чемпионатының 1/8 финалдық кезеңінде Қазақстан құрамасы Е тобында сынға түсіп жатқан Португалия немесе Мароккомен ойнайды. Ойын 26 қыркүйекте сағат 20:00-де өтеді.

Қазақстан құрамасы биылғы әлем чемпионатының D тобындағы алғашқы ойынын Испанияға қарсы өткізіп, 1:1 есебімен тең тарқасқан еді. Ал Ливияға қарсы өткізген екінші ойында Қазақстан құрамасы 4:1 есебімен жеңіске жетті.

Айта кетейік, 6 қазанға дейін болатын футзалдан әлем чемпионатына алты топқа бөлінген 24 команда қатысып жатыр. Әр топта үздік атанған 2 құрама плей-офф кезеңіне тікелей жолдама алады. Сонымен бірге әр топта үшінші орын алған құрамалар арасында үздік атанған 4 команда да келесі кезеңге өтеді.

Мәтіннен қате тапсаңыз, бізге жазыңыз