Футзалдан Қазақстан құрамасының бас бапкері Рикардо Кака әлем чемпионатының плей-офф кезеңіне ойыншылардың дайындығы туралы айтты. Бұл туралы KAZ.NUR.KZ ұлттық құраманың Instagram желісіндегі ресми парақшасына сілтеме жасап хабарлайды.
"Біз матч өтетін аренада дайындалып жатырмыз. Өзіміздің тактикалық әрі комбинациялық ойын үлгімізді пысықтап жатырмыз. Дайындық жақсы деңгейде өтіп жатыр. Қазір біз видео-шолулар мен қайталауларды қарап, талқылап жатырмыз.
Бұл ойынға Лео қатыса алмайды. Бірақ мен бір ғана ойыншыға иек артпаймын. Құрамада Леоның орнын жаба алатын ойыншылар жетерлік. Дисквалификациядан, жарақаттан кейін қатарымызға қосылатын ойыншыларды да атап өтуіміз керек.
Ташкентте өткен ойында жанкүйерлер бізді жылы қарсы алды. Ал Португалияға қарсы ойынымыз Әндіжанда өтеді. Біз өзіміздің үйімізге қайта оралдық десек те болады. Бұл матчта біз қарсылас командадан бір нәрсе арқылы алда тұрамыз. Ол – жанкүйерлердің ыстық ықыласы", - деді Рикардо Кака.
Айта кетейік, Қазақстан ұлттық құрамасы 26 қыркүйекте Өзбекстанның Әндіжан қаласында Португалияға қарсы кездесу өткізеді. Матч сағат 20:00-де басталады.
Сондай-ақ бұл ойынға ұлттық құрама сапынан Лео қатыса алмайды. Ол өткен ойында қызыл қағаз алып, алаңннан қуылған еді.
Мақаланың түпнұсқасы: https://kaz.nur.kz/sport/football/2165683-bir-gana-oiynshyga-iek-artpaimyn-bas-bapker-ulttyq-quramanyng-plei-offqa-daiyndygy-turaly-aitty/
