"Астана" футбол клубының басшысы "Қайраттың" чемпион атану мүмкіндігін бағалады

"Астана" футбол клубының басшысы Саян Хамитжанов алматылық "Қайраттың" биылғы Қазақстан премьер-лигасында чемпион атануы мүмкіндігіне қатысты пікір білдірді. Бұл туралы KAZ.NUR.KZ хабарлайды.

"Еурокубоктарда плей-офф кезеңіне шығу мақсатымыз болатын, біз бұл межеден асып, топтық кезеңге өттік, енді "Челсимен" ойнаймыз. Бұл – қазақстандық жанкүйерлерге үлкен сыйлық. Қазақстан чемпионатында, әсіресе біз барлық ойынды сырт алаңда өткізіп жатқанымызды ескерсек, еурокубокқа жолдама алу үшін үштікке кіруді мақсат еткен едік, біз қазір 2-орынды иеленіп тұрмыз, сонымен қатар, Лига кубогының финалына шықтық. Осылайша маусымдағы мақсатымыз толық орындалды деуге болады.

Егер "Қайрат" премьер-лига чемпионы атанса, бұл клубтың мерейтойына арналған керемет жетістік болар еді. Мен олар үшін ерекше қуанып, келесі жылы Чемпиондар лигасында сәттілік тілер едім", - деді Саян Хамитжанов клубтың Instagram желісіндегі ресми парақшасында.

Айта кетейік, футболдан Қазақстан премьер-лигасының аяқталуына бір тур қалғанда, "Қайрат" 44 ұпай еншілеп, турнир кестесінде көш бастап келеді. Ал "Астана" 43 ұпаймен 2-орында тұр. Чемпион атану үшін "Қайрат" соңғы турда сырт алаңда "Атырауды" жеңуі тиіс. Ал "Астана" өз алаңында талдықорғандық "Жетісуды" қабылдайды.

Мәтіннен қате тапсаңыз, бізге жазыңыз