Бүгін "Астана" сырт алаңда Конференция лигасындағы үшінші матчын өткізеді

Бүгін, 7 қарашада "Астана" футбол клубы УЕФА Конференция лигасы жалпы кезеңінің 3-турында кипрлық "Пафос" командасымен сырт алаңда кездесу өткізеді. Бұл туралы KAZ.NUR.KZ хабарлайды.

Лимасол (Кипр) қаласында орналасқан стадионда өтетін ойын Қазақстан уақыты бойынша 22:45-те басталады.

Матчты тікелей эфирде Qazsport телеарнасы көрсетеді. Аталмыш матчқа шотландиялық төреші Дональд Робертсон бастаған төрешілер ұжымы қызмет етеді.

Естеріңізге сала кетейік, УЕФА Конференция лигасының 1-турында "Астана" өз алаңында Сербияның ТСЦ "Бачка-Топола" клубын 1:0 есебімен жеңген болатын, ал 2-турда Англияда Уэльстің "Нью-Сейнтс" командасына 0:2 есебімен жол берді.

"Астана" УЕФА Конференция лигасының жалпы кезеңінде 28 қарашада "Виториямен" (Португалия), 12 желтоқсанда "Челсимен" (Англия), 19 желтоқсанда "АПОЭЛ"-мен (Кипр) ойнайды.