Футболдан Қазақстан ұлттық құрамасы қатарынан төртінші рет жеңіліп қалды

Бүгін, 14 қарашада футболдан Қазақстан құрамасы УЕФА Ұлттар лигасы топтық кезеңінің 5-туры аясында өз алаңында Аустрияға қарсы ойнап, жеңіліске ұшырады. Бұл туралы KAZ.NUR.KZ хабарлайды.

Алматыдағы Орталық стадионда өткен матч 0:2 есебімен аустриялықтардың пайдасына шешілді. Қонақтар сапынан Кристоф Баумгартнер (15-минутта) және Михаэль Грегорич (25-минутта) гол салды.

Айта кетейік, матчтың 23-минутында қазақстандық ойыншы Александр Марочкин қызыл қағаз алып қалды. Сөйтіп алаң иелері ойынды 10 футболшымен жалғастыруға мәжбүр болды.

Осылайша Қазақстан құрамасы Ұлттар лигасының жаңа маусымында қатарынан төртінші рет жеңіліп отыр. Бұған дейін Станислав Черчесов шәкірттері Норвегиямен тең ойнаса (0:0), Аустриямен бірінші ойында ұтылып қалды (0:4) және Словенияға екі рет есе жіберді (0:3, 0:1).

Енді Қазақстан футболшылары 17 қарашада топтық кезеңдегі соңғы ойынын сырт алаңда Норвегияға қарсы өткізеді. Осло қаласындағы "Уллеволь" стадионында болатын матч 22:00-де басталады.

Мәтіннен қате тапсаңыз, бізге жазыңыз