"Астана" футбол клубы Конференция лигасында cоңғы минуттарда жеңісті жіберіп алды

Бүгін, 28 қарашада "Астана" футбол клубы УЕФА Конференция лигасы жалпы кезеңінің 4-туры аясында өз алаңында португалиялық "Витория" (Гимарайнш) командасымен ойнап, тең тарқасты. Бұл туралы KAZ.NUR.KZ хабарлайды.

Алматының Орталық стадионында өткен матч 1:1 есебімен аяқталды. Алаң иелері сапынан Бранимир Калаица 40-минутта гол салды. Ал 89-минутта "Витория" ойыншысы Хесус Рамирес мергендік танытып, есепті теңестірді. Осылайша "Астана" клубы қолда тұрған жеңістен соңғы минуттарда айырылып қалды.

Бұған дейін "Астана" сербиялық "ТСЦ Бачка-Топола" клубынан 1:0 есебімен басым түскенімен, Уэльстің "Нью-Сейнтс" (0:2) және Кипрдің "Пафос" (0:1) клубтарына есе жіберген болатын. Ал "Витория" ұжымы словениялық "Целе" (3:1), швециялық "Юргорден" (2:1) және чехиялық "Млада-Болеслав" (2:1) командаларын жеңген.

Енді "Астана" командасы 12 желтоқсанда Алматыда "Челсиді" (Англия) қабылдайды. Кейін 19 желтоқсанда елордалық клуб Конференция лигасы жалпы кезеңінің соңғы турында "АПОЭЛ"-мен (Кипр) кездеседі.

Еске салайық, 23 қарашада "Астана" ұжымы Қазақстан футболы тарихындағы алғашқы Лига кубогын жеңіп алған еді. Команда финалда тағы бір елордалық клуб "Жеңісті" 2:0 есебімен ұтты.

Мәтіннен қате тапсаңыз, бізге жазыңыз