"Адана Демирспор" сапында ойнайтын қазақстандық футболшы Абат Айымбетов Түркия Суперлигасының 16-туры аясында "Бешікташқа" қарсы матчта гол соқты. Бұл туралы KAZ.NUR.KZ хабарлайды.
Кеше, 16 желтоқсанда "Адана Демирспор" клубы өз алаңында "Бешікташ" клубын қабылдады. Матчтың нәтижесі бойынша "Адана Демирспор" клубы 2:1 есебімен жеңіске жетті.
Матчтың 31-минутында "Адана Демирспор" клубының Юсуф Бараси есепті ашса, 39-минутында қазақстандық шабуылшы Абат Айымбетов есепті еселей түсті.
Ал матчтың 72-минутында "Бешікташ" клубының ойыншысы Али аль-Моатасембелла есеп айырмасын қысқартты.
Сондай-ақ "Бешікташ" клубы сапында тағы бір қазақстандық футболшы Бақтиер Зайнутдинов доп тебеді. Ол бұл ойынның 46-минутында алаңға шыққан болатын.
Айта кетейік, "Адана Демирспор" Түркия Суперлигасының биылғы маусымында 5 ұпай жинап, турнир кестесінің 19-орнына тұрақтады. Ал "Бешікташ" клубы 25 ұпаймен 6-сатыға жайғасқан.
Абат Айымбетов екінші матч қатарынан гол соқты. Түркия Суперлигасының 15-турында "Гезтепе" қақпасына гол соққан болатын.
Мақаланың түпнұсқасы: https://kaz.nur.kz/sport/football/2201001-abat-aiymbetov-turkiia-superligasynda-qatarynan-ekinshi-matchta-gol-soqty-video/
