АҚШ президенті Джо Байден аргентиналық футболшы Лионель Мессиге еркіндік медалін тағайындаған еді. Бірақ Месси Ақ үйдегі марапаттау рәсіміне барған жоқ, деп хабарлайды Goal басылымына сілтеме жасаған KAZ.NUR.KZ.
Президенттің еркіндік медалінің иегері ретінде 19 адам таңдалған. Оның ішінде Аргентина құрамасының және америкалық "Интер Майами" футбол клубының ойыншысы Лионель Месси де бар. Бірақ ол марапаттау рәсіміне барған жоқ.
Goal басылымының жазуынша, Мессидің Ақ үйге бара алмауына жұмыс кестесінің тығыздығы себеп болған. Аргентиналық футболшының атынан жарияланған мәлімдемеде былай делінген:
"Лео клуб арқылы Ақ үйге хат жіберіп, бұл құрметке ие болу үлкен мәртебе екенін айтты, бірақ жұмыс кестесінің тығыздығы мен алдын ала жоспарланған міндеттемелерге байланысты ол қатыса алмайтынын жеткізді. Ол алғыс білдіріп, Байденмен болашақта кездесуге мүмкіндік туатынына үміттенетінін атап өтті".
Айта кетейік, еркіндік медалі президенттің таңдауы бойынша АҚШ-тың өркендеуіне, әлемдегі бейбітшілікке немесе басқа да маңызды қоғамдық, мемлекеттік немесе жеке бастамаларға айрықша үлес қосқан адамдарға табысталады.
Мақаланың түпнұсқасы: https://kaz.nur.kz/sport/football/2208063-lionel-messi-aqsh-prezidentining-medalin-alu-ushin-aq-uige-bargan-zhoq-sebebi-belgili-boldy/
