"Барыс" хоккей клубы тағы да жеңіліп қалды

Құрлықтық хоккей лигасы аясындағы кезекті ойында астаналық "Барыс" клубы өз алаңында Ресейдің "Авангард" (Омбы) командасымен ойнады. Бұл туралы KAZ.NUR.KZ тілшісі хабарлайды.

Кездесу 1:3 есебімен аяқталып, "Авангард" ұжымының пайдасына шешілді.

Матчтың 16-минутында астаналық команда сапынан Аркадий Шестаков мергендік танытып, есеп ашты. Ал 27-минутта "Авангард" хоккейшісі Михаил Гуляев шайба салса, 3 минуттан соң оның командаласы Николай Прохоркин қақпаны дәл көздеді. Кейін ресейлік клубтың тағы бір ойыншысы Сергей Бойков (59-минутта) үшінші голдың авторы атанды.

Айта кетейік, "Барыс" ұжымы осымен қатарынан алтыншы рет жеңіліске ұшырады. Бұған дейін елордалық команда "Ак Барстан" (Ресей, Қазан) 1:3 есебімен ұтылған еді.

Енді "Барыс" клубы келесі төрт ойынын да өз алаңында өткізеді. 4 және 6 ақпанда "Амур" (Хабаровск) ұжымымен ойнаса, 8 ақпанда СКА (Санкт-Петербург), 10 ақпанда "Спартак" (Мәскеу) клубтарымен кездеседі.

Қазір "Барыс" құрлықтық хоккей лигасының кестесінде 20-орында тұр. Ал "Авангард" 81 ұпаймен 2-орынға көтерілді.

Мәтіннен қате тапсаңыз, бізге жазыңыз