Құрлықтық хоккей лигасының кезекті чемпионаты аясында астаналық "Барыс" клубы ресейлік "Сибирден" сырт алаңда жеңіліс тапты. Бұл туралы KAZ.NUR.KZ хабарлайды.
Новосібірдегі "Сибирь Аренада" өткен бұл матчта алаң иелері 2:0 есебімен жеңіске жетті.
"Сибирь" хоккей клубы сапынан Тимур Ахияров (16-минут) пен Владимир Бутузов (37-минут) "Барыс" қақпасынан саңылау таба білді.
Осылайша "Барыс хоккей клубы қатарынан үшінші мәрте жеңіліске ұшырады. Бұған дейін елордалық команда "Авангардтан" (2:3) және "Амурдан" (0:3) жеңілген болатын.
31 матчтан кейін 21 ұпай жинаған астаналықтар Шығыс конференциясында "Амур" командасын ғана басып озып, соңғы 11-орында тұр.
Айта кетейік, елордалық "Барыс" хоккей клубы келесі кездесуін 29 қарашада Магнитогорскіде былтырғы Гагарин кубогының иегері "Металлургке" қарсы өткізеді.
Мақаланың түпнұсқасы: https://kaz.nur.kz/sport/hockey/2193564-barys-qhl-da-qatarynan-ushinshi-marte-zhengiliske-ushyrady/
