Хоккейден Қазақстан жастар құрамасы әлем чемпионатының элиталық дивизионында қалу үшін өткен Германияға қарсы ойында жеңіліп қалды. Бұл туралы KAZ.NUR.KZ хабарлайды.
Канада астанасы Оттавада өткен матч 4:3 есебімен Германия құрамасының пайдасына шешілді. Қазақстан командасы сапынан Асанәлі Русланұлы (5-минутта), Никита Ситников (18) және Артур Гросс (23) мергендік танытты. Ал жеңімпаздардан Максим Шафер дубль жасаса (5 және 24), Эдвин Тропманн (25) және Юлиус Шумпф (45) бір шайбадан салды.
Осылайша, Қазақстан құрамасы әлем чемпионатының жалпы кестесінде соңғы, оныншы орынды иеленіп, элиталық дивизионнан шығып қалды. Ұлттық команда 2025 жылдың соңында IA дивизионында ойнайды.
Айта кетейік, Қазақстан құрамасы әлем чемпионатының топтық кезеңінде B тобында өнер көрсетіп, 4 рет жеңіліп, 1 ғана ұпай жинай алды. Ұлттық команда Швециядан 1:8, Чехиядан 2:14, Швейцариядан 1:3, Словакиядан 4:5 есебімен (овертаймда) ұтылып, плей-офф сатысына шыға алмай қалған еді.
Мақаланың түпнұсқасы: https://kaz.nur.kz/sport/hockey/2207615-qazaqstan-hokkei-quramasy-alem-chempionatynyng-elitalyq-divizionynan-shygyp-qaldy/
