"Барыс" Астанада Ресейдің "Сибирь" клубын шаң қаптырды

Астананың "Барыс" клубы Құрлықтық хоккей лигасындағы кезекті ойынында өз айдынында Ресейдің "Сибирь" (Новосібір) клубын қабылдап, тартысты матчта 6:4 есебімен жеңіске жетті, деп хабарлайды 1bol.kz.

Кездесу қонақтардың қарқынды шабуылынан басталды. Алғашқы бес минутта-ақ ресейлік клубтың ойыншылары Роман Калиниченко мен Скотт Уилсон екі шайба соғып, есепті 0:2-ге жеткізді. Алайда "Барыс" намысты қолдан бермей, Семён Симонов (8-минут) пен Дмитрий Бреус (22-минут) жауапты шайбаларымен таразы басын теңестірді.

Көп ұзамай "Сибирь" сапынан Никита Сошников (23-минут) пен Владислав Кара (27-минут) мергендік танытып, есепті 2:4 қылды. Бірақ алаң иелері берілмеді: Джейк Масси (30-минут) мен дубль жасаған Семён Симонов (37-минут) есепті қайта теңестірді – 4:4.

Шешуші кезеңде астаналықтар жеңісті жұлып алды. Алдымен Иэн Маккошен (48-минут), соңынан Мэйсон Морелли (58-минут) қарсылас қақпасын дәл көздеп, қорытынды есепті 6:4 қылды.

Бұл жеңістен кейін "Барыс" 9 ұпай жинап, 13-орынға көтерілді. Ал "Сибирь" 8 ұпаймен 17-сатыда қалды.

Мәтіннен қате тапсаңыз, бізге жазыңыз