Ақпарат және қоғамдық даму министрі Дархан Қыдырәлі Qazaqstan TV телеарнасының Youtube арнасында шыққан сұхбатында елімізде ережесіз жекпе-жектің трансляциясын шектеу жоспарланып жатқанын айтты.
Ақпарат және қоғамдық даму министрінің сөзінше, бұл балалар арасындағы қатыгездікпен жұмыс істеу үшін қабылданған шара.
"Телеарналарда зорлық-зомбылықты азайту мақсатында ережесіз жекпе-жек сияқты спорт түрлеріне де шектеу қойып жатырмыз, себебі көп жағдайда сондай бағдарламаларды көрген жеткіншектер, әсіресе мектеп балалары сол әдіс-тәсілді қолдану мақсатында кейде бір-біріне қол көтеріп жатады.
Біз оны кейде байқамай WhatsApp арқылы таратып жатамыз. Мысалы, қыздардың немесе ер балалардың бір-бірімен аяусыз төбелесіп жатқан сәтінен видеолар кейде (әлеуметтік желіде - ред.) шарлап жүреді. Ал зорлық-зомбылық немесе қатыгездіктен қатыгездік туындайтыны белгілі", - деді Қыдырәлі.
Дархан Қыдырәлі осыған байланысты БҰҰ конвенциясына сәйкес арнайы нұсқаулық әзірленіп жатқанын атап өтті.
"Мысалы, кейде баланың суретін жариялап жатады немесе оның аты-жөнін немесе тексерілмеген ақпаратты беріп жатады, оның баланың психологиясына қалай әсер ететінін біз кейде ескермей жатамыз. Соған байланысты жалпы БАҚ-тағы әріптестеріміздің де балалар зорлық-зомбылығы тақырыбына арнайы дайындықпен келгені абзал", - деп түйіндеді ол берген сұхбатында.
Мақаланың түпнұсқасы: https://kaz.nur.kz/sport/mma/2034396-qazaqstanda-erezesiz-zekpe-zektin-translyaciyasyn-sekteu-zosparlanuda/
