Шавкат Рахмонов америкалық файтермен жұдырықтасуы мүмкін

Қазақстандық файтер Шавкат Рахмоновтың келесі жекпе-жегі туралы ақпарат пайда болды. Бұл туралы KAZ.NUR.KZ X желісіндегі MMA Daily парақшасына сілтеме жасап хабарлайды.

Дереккөздің жазуынша, Шавкат Рахмонов биыл жазда Сиэтлдегі (АҚШ) UFC турнирінде Колби Ковингтонмен кездесуі мүмкін.

Айта кетейік, қазір Шавкат Рахмонов UFC-дің жартылай орта салмақ бойынша рейтингінде 3-орында, ал Колби Ковингтон 5-орында тұр.

Шавкат пен Колби өткен жылдың желтоқсанында бір турнирге қатысқан еді. Ол кезде қазақстандық файтер Стивен Томпсонмен жұдырықтасып, екінші раундта жеңіске жетті. Ал Колби бұл турнирде Леон Эдвардстен ұтылып қалған болатын. Қазір Ковингтонның активінде 17 жеңіс, 4 жеңіліс бар. Ал Шавкат 18 жекпе-жек өткізіп, бірде-бір рет жеңілмеген.

Еске салайық, осыған дейін Шавкат Рахмоновтың менеджері Саят Абдрахманов файтердің жоспарларын айтқан еді.

"Шавкат жазда оралуды жоспарлап отыр. Егер сәуірде Леон Эдвардс – Белал Мухаммад арасында жекпе-жек өтетіні расталса және Леон жазда қайта оралуды қаласа, Шавкат белбеуді ұтқан адаммен жұдырықтасады. Ол Леон не Белал", – деген еді Саят Абдрахманов.

Мәтіннен қате тапсаңыз, бізге жазыңыз