"Әлі де кеш емес": Арман Әшімов UFC-мен келісімшарт жасасқысы келетінін айтты

Қазақстандық аралас жекпе-жек шебері Арман Әшімов UFC промоушені туралы айтты. Бұл туралы KAZ.NUR.KZ Bokey Youtube арнасына сілтеме жасап хабарлайды.

Өткен жылы UFC-дің ресми сайтында қазақстандық аралас жекпе-жек шебері Арман Әшімовтің профилі пайда болған еді.

"– Менің естуімше, келісімшартқа қол қойылған және жекпе-жек Сингапурда өтуі керек еді. Бірақ неге болмай қалды?

– Келісімшартқа қол қойылған жоқ. Қол қойылса, жекпе-жек беретін еді. Маған бір қарсылас ұсынды, мен келістім. Бірақ келесі күні қарсыласым жекпе-жекке шықпайтыны туралы жаңалықты естідім.

– Қазір UFC-мен келісімшарт жасауға мүмкіндік бар ма?

– Маған Саят Абдрахманов ең бастысы, АҚШ-қа виза алшы деді. Қазір Азияда, Еуропада UFС жекпе-жектері аз болып жатыр ғой. Көбі АҚШ-та өтеді. Мен екі рет АҚШ-қа визаға тапсырдым. Бірақ екеуінде де виза бермеді. Былай қарап тұрсаң менің атымда не үй жоқ. Ресми түрде ажырасқанмын. Дипломым бар, екі балам бар, әйелім, әке-шешем бар. Басқа ештеңем жоқ.

– Өкініш бар ма?

– Болар іс болды. Бірақ әлі де кеш емес қой. Адамдар 40-50 жаста да төбелесіп жүр. UFC-ге кірді деген атақ керек емес ешкімге. Ол жерге кірсең жеңу керек. Аллаға шүкір UFC-де біздің Шавкат, Асу бауырымыз, сосын Бекзат Алмахан бар", – деді қазақстандық файтер.

Арман Әшімов 23 наурызда Жапонияда өтетін Rizin Landmark 9 турниріне қатысады. Оның қарсыласы – жапониялық файтер Юсаку Накамура. Әшімов бұл турнирде 57 келіге дейін салмақта сынға түседі.