Шавкат Рахмоновты жекпе-жекке шақырған файтер қолын сындырып алды (фото)

Шавкат Рахмоновты жекпе-жекке шақырған аустралиялық файтер Джек Делла Маддалена қолын сындырып алды. Бұл туралы KAZ.NUR.KZ тілшісі хабарлайды

Джек Делла Маддалена Майамиде (АҚШ, Флорида штаты) өткен UFC 299 турнирінде Бразилия өкілі Гилберт Бернсті техникалық нокаутпен жеңген еді. Аустралиялық файтер осы жекпе-жекте жарақат алыпты.

"Джек Делла Маддалена жекпе-жектің басында қолын сындырып алды. Бірақ бұл жағдай оған кездесуді аяқтауға кедергі жасаған жоқ. Нағыз жауынгер! P.S. Гилберттің соққылары өте мықты!", – деп жазды Маддаленаның менеджері Тим Симпсон Instagram парақшасындағы Stories-ке.

Айта кетейік, Маддалена UFC 299 турнирінде жеңіске жеткен соң октагонда тұрып Шавкат Рахмоновты жекпе-жекке шақырған еді. Қазақстандық файтер бұл шақыруға X желісіндегі ресми парақшасында жауап берді.

"Мен сенің батылдығың мен сенімділігіңді құрметтеймін, Джек. Бірақ сені менің осы уақытқа дейінгі қарсыластарым бастан кешкен тағдыр күтіп тұр", – деп жазды Рахмонов.

Мәтіннен қате тапсаңыз, бізге жазыңыз