Конор Макгрегор UFC-дегі мансабына қатысты жоспарын айтты

Ирландиялық аралас жекпе-жек шебері Конор Макгрегор UFC-ге оралуын асыға күтіп жүргенін айтты. Бұл туралы KAZ.NUR.KZ MMA Fighting порталына сілтеме жасап хабарлайды.

35 жастағы Макгрегор соңғы рет 2021 жылдың шілдесінде жекпе-жекке шығып, АҚШ өкілі Дастин Порьеден техникалық нокаутпен жеңіліп қалған еді.

"Мен оралуды және қайта қалпыма келуді асыға күтемін. Мұны шынымен қалаймын. Қазір 2024 жылдың бірінші тоқсаны, жылдың соңына дейін әлі көп уақыт бар. Менің келісімшартымда екі жекпе-жек қалды, келіссөздер жалғасып жатыр", – деді ирландиялық файтер.

Макгрегор – жеңіл және жартылай жеңіл салмақтағы бұрынғы UFC чемпионы. Ол ММА-дағы мансабында 22 рет жеңіске жетіп, 6 мәрте жеңіліске ұшыраған.

Еске салайық, UFC президенті Дана Уайт Конор Макгрегордың келесі жекпе-жегі туралы ресми мәлімдеме жасаған еді.

Мәтіннен қате тапсаңыз, бізге жазыңыз