UFC-дің жеңіл салмақ дәрежесіндегі бұрынғы чемпионы Петр Ян қазақстандық файтер Шавкат Рахмонов туралы пікірін айтты. Бұл туралы KAZ.NUR.KZ Gorilla Fighting Youtube арнасына сілтеме жасап хабарлайды.
"Шавкатта чемпион болуға мүмкіндік беретін барлық нәрсе бар. Ол – бірегей файтер. Он сегіз жекпе-жегінде уақытынан бұрын жеңген. Бұл – өте керемет нәтиже", – деді Петр Ян.
Еске салайық, Шавкат Рахмонов соңғы жекпе-жегін 2023 жылдың желтоқсан айында америкалық файтер Стивен Томпсонға қарсы өткізген еді. Бұл кездесуде Рахмонов қарсыласын екінші раундта тұншықтыру әдісімен жеңді. Осылайша, ММА спортындағы он сегізінші, ал UFC-дегі алтыншы жеңісіне қол жеткізді. Қазір қазақстандық файтердің активінде бірде-бір жеңіліс жоқ.
Айта кетейік, аустралиялық аралас жекпе-жек шебері Джек Делла Маддалена қазақстандық файтер Шавкат Рахмоновқа қарсы кездесу туралы мәлімдеме жасаған еді.
Мақаланың түпнұсқасы: https://kaz.nur.kz/sport/mma/2080610-savkat-raxmonov-cempiony-bolady-reseilik-faiter-petr-yan-nomad-turaly-pikirin-aitty/
